Меѓу православните литургиски традиции постои една разлика, која е изразена во Проскомидијата. Во некои православни цркви, меѓу деветте чинови на светите кои се спомнуваат при вадењето на честици од просфорите, на прво место, пред свети Јован Предтеча, се поставуваат Архангелите Михаил и Гавриил, а исто така и сите пренебесни бесплотни сили т. е. ангелите.*

Други православни цркви на проскомидијата не ги спомнуваат ангелите, туку веднаш почнуваат со свети Јован Предтеча. Зад овие две особености на богослужбената практика стои сериозно богословско прашање: се однесува ли Откупувањето, спасението преку Христовата Крв, Неговата Крстна жртва, само кон човечкиот род, или пак тоа ги вклучува и ангелите и има космичко значење? Предназначена ли е Тајната на Христовите Тело и Крв, светата Евхаристија, исто така и за ангелите, кои немаат тела? Конечно, се распространил ли човековиот гревопад и на ангелите, така што и тие да имаат потреба од откупување? Тоа се прашања кои ги поставува евхаристиското спомнување на ангелските сили.